ವಾರಾಣಸಿ: ಸುಮಾರು ಒಂದು ವರ್ಷದ ಹಿಂದೆಯೇ ತೀರಿ ಹೋಗಿದ್ದ ಅಮ್ಮನ ಕಳೇಬರದೊಂದಿಗೇ ಆಕೆಯ ಇಬ್ಬರು ಹೆಣ್ಣುಮಕ್ಕಳು ವಾಸವಿದ್ದ ಆಘಾತಕಾರಿ ಘಟನೆ ಉತ್ತರ ಪ್ರದೇಶದ ವಾರಾಣಸಿಯಲ್ಲಿ ಬೆಳಕಿಗೆ ಬಂದಿದೆ.
ವಾರಾಣಸಿ ನಗರದ ಮದರ್ವಾ ಪ್ರದೇಶದಲ್ಲಿನ ಮನೆಯಲ್ಲಿ ಅಮ್ಮನ ಕಳೇಬರದೊಂದಿಗೆ ಈ ಸಹೋದರಿಯರು ವಾಸವಾಗಿದ್ದರು. ಕಳೆದ ಕೆಲವು ದಿನಗಳಿಂದ ಈ ಹೆಣ್ಣುಮಕ್ಕಳು ಕಾಣದ ಹಿನ್ನೆಲೆಯಲ್ಲಿ ಅಕ್ಕಪಕ್ಕದ ಮನೆಯವರು ಪರಿಶೀಲಿಸಿದಾಗ ಘಟನೆ ಬಹಿರಂಗವಾಗಿದೆ. ನೆರೆಹೊರೆಯವರು ಪರಿಶೀಲಿಸಿದಾಗ ಮನೆಯ ಬಾಗಿಲು ಮುಚ್ಚಿತ್ತು. ಅನುಮಾನಗೊಂಡ ಅವರು, ಸಹೋದರಿಯರ ಸಂಬಂಧಿಕರನ್ನು ಸಂಪರ್ಕಿಸಿದ್ದರು. ಮನೆಗೆ ತಲುಪಿದ ಸಂಬಂಧಿಕರು, ಘಟನೆ ಕುರಿತು ಪೊಲೀಸರಿಗೆ ಮಾಹಿತಿ ನೀಡಿದ್ದರು.
ಲಂಕಾ ಪೊಲೀಸ್ ಠಾಣೆಯ ಪೊಲೀಸರು ಮನೆಯ ಬಾಗಿಲು ಒಡೆದು ಒಳಗೆ ಪ್ರವೇಶಿಸಿ, ಮಹಿಳೆಯ ದೇಹವನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ. ಈ ವೇಳೆ ಇಬ್ಬರೂ ಹೆಣ್ಣುಮಕ್ಕಳ ಅಮ್ಮನ ಶವದ ಪಕ್ಕದಲ್ಲಿ ಕುಳಿತಿದ್ದರು ಎಂದು ವರದಿಯಾಗಿದೆ. ಉಷಾ ಅವರ ಶವದ ಚರ್ಮ ಹಾಗೂ ಮಾಂಸ ಕೊಳೆತು ಅಸ್ಥಿಪಂಜರದ ಭಾಗಗಳು ಮಾತ್ರ ಉಳಿದಿದ್ದವು.
ಮೃತ ಮಹಿಳೆಯನ್ನು ಉಷಾ ತಿವಾರಿ (52) ಎಂದು ಗುರುತಿಸಲಾಗಿದೆ. ಆಕೆ 2022ರ ಡಿಸೆಂಬರ್ 8ರಂದು ಆಕೆ ಮೃತಪಟ್ಟಿದ್ದರು. ಆದರೆ ಆರ್ಥಿಕ ಸಂಕಷ್ಟದಲ್ಲಿದ್ದ ಕಾರಣ ಅವರ ಅಂತ್ಯಸಂಸ್ಕಾರ ನೆರವೇರಿಸಲು ಹೆಣ್ಣುಮಕ್ಕಳು ಮುಂದಾಗಿರಲಿಲ್ಲ. ಆಕೆಯ ಸಾವಿನ ಬಗ್ಗೆ ಸಂಬಂಧಿಕರಿಗೆ ಕೂಡ ಮಾಹಿತಿ ನೀಡದೆ, ಕಳೇಬರದ ಜತೆ ವಾಸಿಸಲು ನಿರ್ಧರಿಸಿದ್ದರು. ಅಮ್ಮ ಕಳೆದ ವರ್ಷ ಅನಾರೋಗ್ಯದಿಂದ ಸತ್ತಿದ್ದು, ಅಂತ್ಯಸಂಸ್ಕಾರ ನಡೆಸಲು ತಮ್ಮ ಬಳಿ ಹಣವಿರಲಿಲ್ಲ ಎಂದು ಮಕ್ಕಳು ಪೊಲೀಸರಿಗೆ ತಿಳಿಸಿದ್ದಾರೆ.